Tuesday, December 18, 2007

Bleytu virðini eiga tørn

“Føroya løgting hevur í ár samtykt at brúka nærum eina milliard krónur til tunnilsgerð. Eingin vón er fyri at hesir pengarnir kunnu koma aftur við nýtslugjaldi ella á annan hátt, og hetta er okkara tingmanning væl vitandi um.

Samstundis enda vit næstan aftast í Pisa kanningunum hvørja ferð, Studentaskúlin í Hoydølum er ein ruin og játtanin til Fróðskaparsetur Føroya er skorin niður frá at vera láturlig til at vera syndarlig.

Úrslitið verður at vit í 2015 fara hava verðsins besta tunnilsverk, men ongan eftir sum hevur ráð ella vit til at koyra ígjøgnum.

Undirritaðu vilja við hesum mótmæla at alt føroya ríkiømi verður brúkt til at bora hol við."

Soleiðis stendur á heimasíðuni*, har tað frá 5. desembur í ár var gjørligt at sýna sýna ónøgd móti “ørvitistunlunum”, ið nýggjastu tunnilsætlanirnar hava fingið navn millum manna. Fleiri enn 2.500 hava skrivað undir hetta mótmælið, og alt bendir á, at stríðið millum hørð og bleyt virði kemur at standa høgt á dagsskránni til komandi løgtingsval.


Tíð til bleyt virði

Og sambært eini veljarakanning, ið Fynd gjørdi í farnu viku, so er als eingin ivi um, at tað nú er tíð upp á at taka tey bleytu virðini framum tey hørðu virðini, sum í kanningini eru avmarkað til “betong og asfalt”, t.e. anlegsíløgur í breiðastu merking.

Heili 89 % av veljarunum, ið hava tikið støðu, halda, at landið eigur at taka tey bleytu virðini fram um betong og asfalt.

Tað er breið semja í millum veljarar hjá øllum flokkum um, at soleiðis eigur at vera, hóast fólkafloksveljarar eru nakað lægri umboðaðir, meðan miðfloks-, miðnámsfloks- og sjálvstýrisveljarar eru nakað hægri umboðaðir. Takast skal tó sum fyrivarni, at tølini fyri hesar smáu flokkarnar eru rættiliga smá og tískil ivasom.

Men serliga Sjálvstýrisflokkurin og Miðnámsflokkurin hava beinleiðis profilerað seg sum ein anti-tunnils flokkar, meðan Fólkaflokkurin partvíst hevur profilerað seg sum ein pro-tunnils flokk hesa seinastu tíðina, serliga við at sterki maðurin í flokkinum, Anfinn Kallsberg, legði fram uppskotið um tunnil norður um fjall á Borðoynni – eitt uppskot, ið tó gjørdist jólatrøll sum so mong onnur mál.

Eigur landið at taka tey bleytu virðini fram um betong og asfalt?
Siga seg velja
Ja
Nei
Fólkaflokkin
83%
17%
Sambandsflokkin
87%
13%
Javnaðarflokkin
91%
9%
Sjálvstýrisflokkin
95%
5%
Tjódveldisflokkin
90%
10%
Midflokkin
96%
4%
Miðnámsflokkin
100%
0%
Einans tey, ið hava tikið støðu eru grundarlag undir prosentunum


Kvinnur, Suðurstreymoy og bleyt virði

Tað kemur ikki óvæntað, at kvinnur í størri mun enn menn vilja framraðfesta bleyt virði. Bleyt virði verða jú eisini stundum kallað “kvinnulig” ella “feminin” virði. Men munurin er ikki so avgjørdur. Umleið 93% av kvinnunum ynskja hesa raðfestingina, meðan umleið 85% av monnunum ynskja hana.

Eigur landið at taka tey bleytu virðini fram um betong og asfalt?
Kyn
Ja
Nei
Kvennkyn
93%
7%
Kallkyn
85%
15%
Einans tey, ið hava tikið støðu eru grundarlag undir prosentunum

Veruleikin er, at tað serliga eru fólk í Suðurstreymoy, ið trekkja ja-síðuna upp. Her eru tað heili 94%, ið halda tíðina vera komna til at framraðfesta tey bleytu virðini. Suðuroy, Vágar og Eysturoy liggja kring miðal, meðan Norðoyingar og Norðstreymoyingar eru minni avgjørdir hesum viðvíkjandi. Her kunnu tað vera lokal áhugamál, ið spæla inn: Norðoyingar vilja møguliga hava tunnil norður um fjall umframt eina loysn á farleiðini um Leirvík. Og vestmenningar ynskja sær ivaleyst eisini ein tunnil.

Illar tungur vilja vera við, at orsøkin til mótsøðuna hjá serliga høvuðsstaðarfólki móti betongi og asfalti, er at tað tekur fokus burtur frá øllum teimum “bleytu” íløgunum, ið annars kundu verið gjørdar. Suðurstreymoyingar munnu ivaleyst kenna tað sum at teirra súrt goldnu skattapengar verða “oyðslaðir” burtur til ónyttug ting, heldur enn at koma til sjóndar aftur í øktari vælferð.

Umvent er tað tí heldur ikki løgið, at tað eru sandoyingar, ið eru minst samdir í at raðfesta bleyt virði framum betong og asfalt. Einans uml. 7 av 10 halda at hetta er rætt. Hjá sandoyingum vil sandoyartunnilin jú vera ein søgulig vælferðarøking – ein vælferðarkollvelting, ið fær avgerandi týðning fyri alt samfelagslívið. Ikki einans fyri vinnulívið.

Eigur landið at taka tey bleytu virðini fram um betong og asfalt?
Øki
Ja
Nei
Suðuroy
91%
9%
Sandoy
71%
29%
Suðurstreymoy
94%
6%
Norðurstreymoy
82%
18%
Vágar
87%
13%
Eysturoy
89%
11%
Norðoyggjar
78%
23%
Einans tey, ið hava tikið støðu eru grundarlag undir prosentunum


Harðar íløgur og bleytur rakstur?

Tað er trupult at koma til eina eintýðuga fatan av hvat “bleytt” og “hart” merkir í føroyskum politikki í dag. Veljarakanningin gevur tó nakrar ábendingar um hvat vit ikki vita um hesi hugtøkini, ið ferð aftaná ferð verða blakað út í kjakið uttan nærri frágreiðing.

Spurdir vórðu millum annað tveir spurningar, ið liggja rættiliga tætt upp at hvørjum øðrum:

· Eigur landið at taka tey bleytu virðini fram um betong og asfalt?

og

· Eigur landið heldur at spara í almenna rakstrinum enn í íløgum í vegir og tunnlar?

Tað er longu staðfest, at ein øgiligur meiriluti vil hava bleytu virðini á breddan. Men tað sama er ikki galdandi fyri hvar tað almenna eigur at spara í uppgangstíðum. Nógv tey flestu halda, at “bleytu virðini” skulu raðfestast, men tá tað kemur til almenna útreiðslutálman, fær pípan eitt annað ljóð. Einans 6 út av 10 ynskja at tálmast skal við at steðga íløgur í vegir og tunlar, meðan samsvarandi 4 út av 10 ynskja at sparast skal í rakstrinum.

Spurningur
Ja
Nei
Eigur landið at taka tey bleytu virðini fram um betong og asfalt?
89%
11%
Eigur landið heldur at spara í almenna rakstrinum enn í íløgum í vegir og tunnlar?
38%
62%
Einans tey, ið hava tikið støðu eru grundarlag undir prosentunum

Sostatt eru tað næstan 9 av 10, ið taka undir við at framraðfesta bleytu virðini, men einans gott 6 av 10, ið halda, at landið eigur at spara við at útseta íløgur í vegir og tunlar. Hetta merkir, at knapt 3 av 10 bæði vilja framraðfesta bleytu virðini og spara í almenna rakstrinum.

Hetta má antin merkja, at hesi fólkini ikki eru avklárað um hvat bleyt virði eru, ella hava tey eina greiða – men heilt aðra – fatan av hvat bleyt virði eru. Tað er jú eingin náttúrulóg, ið sigur, at bleyt virðu nýtast at definerast sum “almennur rakstur”.

Ella kanska vilja summi gjarna raðfesta “bleyt virði”, uttan at tað gongur út yvir “hørðu virðini”. Tað er uttan iva soleiðis, at fleiri veljarar helst vilja siga ja til alt, uttan at hugsa tingini í ein størri samanhang. At vera “jaligur” er jú ein populerur eginleiki nógvastaðni í landinum.

Undir øllum umstøðum má staðfestast, at tørvur er á, at “bleytu virðini” verða kannað og definerað. Tí sum nú er hanga tey nærum í leysari luft sum eitt slag av moralskum boðskapi uttan nágreiniligt innihald.


Hvat eru bleyt virði?

Trupulleikin við hugtakinum “bleyt virði”, er at tað ikki er so lætt at avmarka hvat hetta merkir. Merkir tað “alt annað enn betong og asfalt”? Og hví verður tað nevnt sum bleyt virði at byggja skúlar og barnagarðar? Krevja slíkar verkætlanir ikki eisini eina rúgvu av betongi og asfalti?

Ella er tað heldur soleiðis, at “bleyt virði” eru tey økini, ið krevja beinleiðis umsorganarligt samband við onnur menniskju, til dømis sjúkrahúsverkið, almannaverkið og undirvísingarverkið?

Men hví eru tað ikki eisini bleyt virði, at samferðslan riggar sum hon skal, at fysisku arbeiðskarmarnir eru nøktandi, og at bústaðirnir eru sniðgivnir við atliti til lokalar veðurlagstreytir og í samspæli við umhvørvið annars? Øll hesi tingini hava avgerandi týðning fyri at gerandisdagurin hjá fólki skal vera optimalur.

Alt samanumtikið er tað ringt at avgera hvat fólk meina við, tá tey tosa um hørð og bleyt virði. Og tað er ein trupulleiki. Løgtingsvalstríðið kann ikki liva við, at fokus verður flutt frá veruligum evnum til eitt hálvmoralskt kjak um “harðar pakkar” og “bleytar pakkar”. Neyðugt er at finna út av hvat er í hesum spennandi pakkunum, ið verða lagdir undir tað politiska jólatræið í hesum tíðum.

* http://www.gopetition.com/online/15622.html

Monday, December 17, 2007

Læran hjá Laksáfoss vinnur

Magni Laksáfoss hevur einans verið landsstýrismaður í fíggjarmálum í gott eitt hálvt ár, men hóast hetta hevur hann megnað at kollvela politisku skipanina. Summi elska hann og summi orka ikki fyri honum. Hann verður mettur at vera ein erligur politikari – ein, ið torir at siga tingini bart út. Men hetta er jú í sjálvum sær ósambæriligt við tann partin av føroyskum politikki, ið snýr seg um rossahandlar og duldar dagsskráir.

Magni Laksáfoss fekk eitt rættiliga gott fólkatingsval, ið kann benda á eitt líknandi gott val til løgtingsvalið. Um populariteturin hjá honum verður staðfestur við eitt løgtingsval, so er neyvan nakar ivi um, at hann framyvir telist millum sterku menninar í Sambandsflokkinum. Verður lagt afturat, at Sambandsflokkurin møguliga verður størsti flokkur á tingi, so er Magni Laksáfoss nærum óundansleppiligur í einum komandi landsstýri.

Tí hava fleiri av mótstøðumonnum hansara hesa seinastu tíðina roynt at kasta runu á hvítu skjúrtuna hjá Magna Laksáfoss. Hann og hansara meiningar mugu dálkast mest møguligt, soleiðis at hann ikki kemur at standa so sterkur eftir løgtingsvalið. Og higartil hevur dálkingartaktikkurin serliga ligið í samanberingini við Bárð Nielsen, ið eftir øllum at døma hóskaði betri inn í krammið hjá hinum samgonguflokkunum.


Einans norðoyingar vilja skattalætta

Serliga er tað skattaspurningurin, ið liggur í buktini. Bárður Nielsen arbeiddi sum fullblóðs liberalistur fyri at minka um skattatrýstið. Tað er sjálvandi nakað, ið vanliga vil hóska væl inn í politisku ynskini hjá høgravendum veljarum. Men Magni Laksáfoss er hugsjónarliga nærum tað umvenda av sínum undangongumanni. Magni Laksáfoss hevur fingið hugsjónina um afturhaldandi og regulerandi fíggjarpolitikk inn í føroyska kjakið, og tað er nakað, ið hóskar betri til politisku ynskini hjá vinstravendum veljarum.

Ein veljarakanning, ið Fynd hevur gjørt fyri Sosialin, vísir, at heili 65 % av veljarunum, ið hava tikið støðu, ynskja ikki skattalætta í komandi valskeiði, meðan 35 % hinvegin ynskja skattalætta. Serliga er tað í Norðurstreymoy og Suðurstreymoy, at mótsøðan móti skattalætta er størst. Her ynskja umleið 7 av 10 ikki skattalætta. Men eisini í Suðuroy, Sandoy, Vágunum og Eysturoy ynskja umleið 6 av 10 ikki skattalætta.

Einans í Norðoyggjum er skattalættin høgt í kurs. Her ynskja heili 64 % av fólkafloksveljarunum, ið hava tikið støðu, at skattalætti skal latast í komandi valskeiði.

Eigur komandi landsstýri
at geva fleiri skattalættar?
Øki
Ja
Nei
Suðuroy
41%
59%
Sandoy
40%
60%
Suðurstreymoy
29%
71%
Norðurstreymoy
26%
74%
Vágar
39%
61%
Eysturoy
37%
63%
Norðoyggjar
64%
36%
Tey, ið hava svarað ”veit ikki”,
eru ikki við í prosentútrokningini

Tað er ikki nakar avgerandi munur á kynunum viðvíkjandi skattalætta. Tó eru tað nakrar fleiri kvinnur enn menn, ið siga seg ynskja skattalætta. 4 út av 10 kvinnum ynskja skattalætta, meðan 3 av 10 kvinnum ynskja skattalætta í komandi valskeiði.


Heldur rakstur enn íløgur

Men eitt er at tálma vøksturin við at varðveita skattatrstið og harvið at leggja hald á part av peningarenslinum í samfelagnum. Onnur fíggjarpolitiska skrúvan er almenna nýtslan. Tá búskapurin byrjar at kóka yvir, eigur tað almenna at halda aftur við rakstri og íløgum. Spurningurin er so bara um man skal velja at spara í rakstri, íløgum ella í báðum.

Magni Laksáfoss gjørdi seg kendan upp á sítt uppskot um at útseta Sandoyartunnilin til verri tíðir. Í farnu samgonguni var tó ikki semja um hetta, og mett varð rættari eisini at hyggja eftir sparingum í rakstrinum. Trupulleikin við hesi støðutakan er tó, at tað mesta av rakstrinum er lógar- og sáttmálabundið og tískil ikki kann broytast frá degi til dags. Íløgur kunnu hinvegin gerast, strikast ella avtakast við stuttum skoðbráði.

Og tað tykist vera gingið upp fyri veljarunum, at tað ikki er í rakstrinum, at sparast skal, men heldur í íløgunum. 62 % av teimum spurdu, ið hava tikið støðu, halda at tað heldur eigur at sparast í íløgum enn í rakstri. Serliga í Norðurstreymoy er hetta tíðiligt. 7 út av 10 stuðla hesum sjónarmiði. Men eisini í Suðuroy, Vágunum, Suðurstreymoy, Eysturoy og Norðoyggjum eru umleið 6 út av 10, ið, ið heldur vilja spara í íløgum enn í rakstri.

Í so máta hevur fíggjarlógaruppskotið rakt rætt, tí meðan raksturin er hækkaður við umleið 200 miljónum, eru íløgurnar minkaðar við umleið 100 miljónum.

Einasta øki í landinum, har veljarin heldur vil síggja sparingar í rakstri enn í íløgum er Sandoyggin, har einans 4 út av 10 ynskja at spara í íløgum heldur enn í rakstri. Men her eru tølini so smá, at tey tíverri ikki eru so álítandi.*


Eigur landið heldur at spara
í almenna rakstrinum enn í
íløgum í vegir og tunnlar?
Øki
Ja
Nei
Suðuroy
34%
66%
Sandoy
60%
40%
Suðurstreymoy
37%
63%
Norðurstreymoy
30%
70%
Vágar
36%
64%
Eysturoy
39%
61%
Norðoyggjar
43%
58%
Tey, ið hava svarað ”veit ikki”,
eru ikki við í prosentútrokningini


Fólkafloksveljarar heitastir fyri at spara rakstur

Tað eru tey, ið siga seg vilja velja Fólkaflokkin, ið ynskja heldur at spara í almenna rakstrinum enn í íløgum í vegir og tunnlar. Men heldur ikki her er tað sannførandi. Fólkafloksveljarar standa umleið á jøvnum.

Miðflokkaveljarar eru eisini rímiliga samdir við Fólkafloksveljarar. Her ynskja 45 % heldur at spara í almennum rakstri. Fyri hinar flokkarnar eru tað umleið 3 til 4 út av 10 veljarum, ið ynskja heldur at spara í almennum rakstri enn í íløgum í vegir og tunnlar.

Eigur landið heldur at spara
í almenna rakstrinum enn í
íløgum í vegir og tunnlar?
Siga seg velja
Ja
Nei
Fólkaflokkin
49%
51%
Sambandsflokkin
38%
62%
Javnadarflokkin
27%
73%
Sjálvstýrisflokkin
23%
77%
Tjódveldisflokkin
39%
61%
Midflokkin
45%
55%
Miðnámsflokkin
38%
63%
Tey, ið hava svarað ”veit ikki”,
eru ikki við í prosentútrokningini


Læran hjá Laksáfoss vunnið frama

Tað bendir á, at Magni Laksáfoss hevur rakt rætt við sínum politikki. Hetta varð fyrst staðfest á fólkatingsvalinum, og nú bendir á, at veljarin sum heild tekur undir við hansara hugsjón. Tað má sigast at vera ein góð vitan at fara á val við.

Sambandsflokkurin hevur jú roynt at standa sum tann ábyrgdarfulli flokkurin, ið ikki kundi standa vitni til at ein javnaðarmaður og ein fólkafloksmaður høvdu eina hálva miljard reikandi uttanfyri fíggjarlógina. Bæði Sambandsflokkurin sum heild og Magni Laksáfoss sum persónur hava dugað at sett seg í eina martýrstøðu í mun til hinar báðar flokkarnar.

Um Magni Laksáfoss og Sambandsflokkurin megna at halda fast um “Læruna hjá Laksáfoss” heilt fram til valið, so kunnu hinir samgonguflokkarnir verða noyddir til at laga seg til hesa læruna. Og tá kann gerast talan um eina samgongu við einum fullkomiliga øðrvísi búskaparhugsjón enn tann undanfarna.


Laksáfoss stuðul úr Tjóðveldi

Men alt er ikki so ljósareytt sum tað tykist hjá Sambandsflokkinum og Magna Laksáfoss. So løgið tað ljóðar eru eingir veljarar so ósamdir við Magna Laksáfoss sum júst veljararnir hjá Sambandsflokkinum. Einans 48 % av teimum, ið hava tikið støðu, stuðla afturhaldandi skattapolitikkinum, meðan 52 % hinvegin vilja hava fleiri skattalættar í komandi valskeiði.

Sjálvt av fólkafloks- og sjálvstýrisveljarunum vilja umleið 6 av 10 ikki vita av skattalætta. Umleið 7 av 10 mið- og javnaðarfloksveljarunum vilja ikki hava skattalætta. Og mest móti skattalætta eru veljararnir hjá Tjóðveldi og Miðnámsflokkinum, har umleið 8 av 10 ikki ynskja skattalætta.

Eigur komandi landsstýri at geva fleiri skattalættar?
Siga seg velja
Ja
Nei
Fólkaflokkin
42%
58%
Sambandsflokkin
52%
48%
Javnadarflokkin
32%
68%
Sjálvstýrisflokkin
38%
62%
Tjódveldisflokkin
21%
79%
Midflokkin
33%
67%
Miðnámsflokkin
14%
86%
Tey, ið hava svarað ”veit ikki”,
eru ikki við í prosentútrokningini

Spurningurin er so um Magni Laksáfoss í grundini er limur í skeivum flokki. Tað eru veljararnir úr Tjóðveldi, ið eru mest samdir við honum hvat viðvíkur skattatrýst. Hinvegin fær hann eisini dyggan stuðul úr Sjálvstýrisflokkinum og Javnaðarflokkinum hvat viðvíkur heldur at útseta íløgur í veghir og tunnlar heldur enn at spara í rakstri.

Ella er Sambandsflokkurin í veruleikanum í ferð við at velta politisku moldina til eina heilt nýggja samgongu eftir valið?


* Viðvíkjandi smáu valdømunum og smáu flokkunum eru tølini í veljarakanningini so smá, at tað saktans kann raka meiri enn 10 % við síðunar av, tá hesir smábólkarnir verða býttir upp í uppaftur smærri bólkar. Strangliga tikið má innanhýsis býtið av meiningum í smáu flokkunum og smáu valdømunum ikki síggjast sum annað enn ein ábending.

Saturday, December 1, 2007

X-mas 1888 – Vetrarøl við køldum smakki

Føroya Bjór fyllir 120 ár komandi ár. Hetta ynskir bryggjaríið at hátíðarhalda við eini alternativari jólabryggj, ið hevur fingið navnið X-mas 1888, har navnið sipar aftur til árið, tá Føroya Bjór varð grundað av gamla bakaranum Símuni í Vági.

Tað er altíð áhugavert at smakka bryggjroyndir frá Føroya Bjór, tí støðið er vanliga høgt. Og at sita og njóta eina vælskonkta fatøl undir jólaperunum á Jinx vil altíð vera ein upplýsandi løta í einum annars myrku novembur-mánaði.

At talan er um eina jólabryggj, ber sjálvt etikettan brá av: Jólamaður, jólatræ, jólagávur, kavi – ja, og so ein bannari við boðskapinum “Gleðilig jól”. Etikettan er sera løgin og minnir mest um eina sodavatnsetikett – til dømis Sqviiz – og er harumframt beinleiðis barnslig.

Men innihaldið hevur als ikki sama stíl sum etikettan.

Ølin er vøkur á at líta. Hon hevur ein flottan, myrkareyðan lit sum ein gimsteinur. Av útsjónd er hon sera jólalig. Hon angar tó ikki nakað serligt og tykist sum heild tung – sum eitt glas av siruppi nærmast. Omaná er eitt tunt lag av kremhvítum skúmi. Í fyrstuni setur tað seg vakurt eftir glasinum, meðan man drekkur, men stutt aftaná er hendan “kavaeffektin” horvin.

Hóast talan er um eina at síggja til friðarliga øl, so er hon ikki so friðarlig, tá man kavar undir vatnskorpuna. Fær man sær ein lesk av drykkinum, fær man eina óvæntaða kenslu av tostasløkking. Ølin er snøgt sagt kølin, bæði viðvíkjandi temperaturi, men eisini viðvíkjandi smakki. Ølin hevur ein undarligan, lættan og kaldan smakk, ið ger hana lekra og vetrarliga.


Munnskol og Gammel Dansk

Men hesin kaldi smakkurin er eisini ein vansi, tí hann hevur tað við at doyva tann fjølbroytta smakkin, ið annars er í ølini. Vegna stóru nýtsluna av humlu – tað eru nýtt ikki færri enn trý sløg av humlu – koma kryddini í ølini ikki til sín rætt, eins og tann fólksligi maltsmakkurin nærum er fráverandi, hóast ølin er bryggjað við fýra maltsløgum!

Tað er líka við, at ølin hevur eina fyllu, ið mest av øllum kann samanberast við munnskol – munnskol við ølsmakki. Tað ljóðar kanska vemmiligt, men er faktiskt jaliga hugsað.

Tó – situr man nóg leingi við ølini, so fær man eina kenslu av góða smakkinum, ið minnir um okkurt slag av bitter, til dømis av Gammel Dansk. Væntandi kann hendan ølin tykjast eitt sindur vamlislig hjá tí óvanda øldrekkaranum, men fyri tey, ið vilja nakað meiri enn tað vanliga, er talan heilt víst um eitt áhugavert upplivilsi.

Kanska er ølin tó dekan ov áhugaverd, serliga hvat viðvíkur eftirsmakkin. Smakkurin setir seg í góman og á tunguna og hongur við og gerst á ein hátt næstan irriterandi. Men sum sagt er ølini harumframt svalandi og leskandi og tískil eitt fragd at drekka – um man væl at merkja ikki er smásárur og kennir seg frástoyttan av kraftigu humluni.

Sum heild er X-mas 1888 ikki nóg “hugnalig” til at vera ein jólaøl. Hon er meiri ein kølin vetrarøl, ið er eitt kærkomið alternativ til søta, klassiska jólabryggið hjá Føroya Bjór. Hóast X-mas 1888 er eitt sindur “kaotisk”, so er talan um eitt deiligt, tungukitlandi síðuspring í einum alt ov sukursøtum desembur-mánaði.

Valið millum arbeiði og frítíð

Prentað sum kronikk í Dimmalætting 4. august 2017 Í løtuni hava nógvir føroyingar summarfrí. Dagligu pliktirnar eru lagdar til síðis na...